نشر المخرج المصري #محمد_سامي صورة من كواليس مسلسل “آدم” تجمعه بتامر حسني وأرفقها برسالة مؤثرة”وَلَا تَنْسَوُا الْفَضْلَ بَيْنَكُمْ و أنا قاعد إمبارح في التصوير افتكرت الرحلة و الشقي و التعب من أول عمل لحد العمل اللي بصوره دلوقتي و افتكرت صعوبة الحصول علي فرصة عشان الواحد يثبت نفسة و يحقق أحلامه، فطبعا افتكرت أخويا و صاحبي الجدع الطيب الخلوق اللي دعمني من أول لحظة و كان سبب في اللي أنا فيه دلوقتي، تامر قدملي كل الدعم و الحب و الامكانيات اللي خلتني اثبت نفسي وبالذات في وقت كان صعب الشباب ياخد في الدرامة فرصة بحجم مسلسل آدم، فاكر اني الكل كان رافض اني اخد الفرصة دي ومستكبرينها عليا الا هو وقف في ظهري كأنه بيحارب لأخوه و بصلي مرة والظروف كلها ضدي و كنت حاسس وانا بحضر انهم هيجيبو حد غيري و قاللي ده مسلسلك و هتعمله و هتنجح و هتنجحنا معاك، حتي طريقته المتواضعة و هو بيقوللي مسلسلك كأني عامل تسع مسلسلات قبله تحسس الواحد بنفسه و أهميته ، أشهد أمام الله إنك طول عمرك متواضع و مؤدب وتطلب الحاجة باحترام، ومع الكرو محترم وعشان كدة كلنا روحنا فيك، بحبك يا صاحبي و تستاهل كل حاجة حلوة يا أجمل قلب، ويا رب يرزق كل الناس باللي يساعدهم علي تحقيق أحلامهم زي ما رزقني بتامر حسني Tamer Hosny “
ليرد الفنان #تامر_حسني عى هذه الرسالة متأثراً بكلام سامي ” يا سامي يا حبيبي يابن الناس الطيبين شكراً من كل قلبي على كل حرف خارج من قلبك كتبته في حقي ، خلتني أدمع يا سمسم 🥹، أولاً أنا صدقت موهبتك من و انت صغير سناً لإنك فعلاً موهوب موهبه مش عاديه و تاريخ نجاحاتك يشهد بكده ، كنت عارف وانا بقدمك إني بقدم مكسب حقيقي للصناعه و من يوم ماسجلت رقمك على تليفوني و هو مكتوب سامي إبني ، عشان كان إصراري على تقديمك كان بقلب أب مش صديق من سنك أب مصدق في إبنه و عارف إن الناس مش هيدوله فرصه يطلع عشان سنه صغير ،و الحمدلله برحلتك و رحلتي اثبتنا للدنيا إنها مش بالسن لأ !!!!… بالمجهود و التعب و الشطاره و المذاكره و انت كل الصفات دي كانت فيك وانا لوحدي اللي عارف ، عشان كده صممت إن الدنيا كلها تعرف معايا حجم موهبتك الحقيقي ، حتى أعمالي اللي من إخراجك ليها مكانه خاصه في قلوب الناس
مسلسل آدم
فيلم أهواك
فيلم تصبح على خير
و لسه إن شاء الله نجاحات جايه مستنيانا مع بعض ، ربنا يوفقك يا حبيبي في كل شغلك اللي جاي و تكسر الدنيا و في القمه زي عادتك ،، يا محمد شكراً تاني على البوست الصادق ده شكراً يا أصيل يا محترم ، ربنا يخلينا دايماً لبعض ضهر و سند 💪🤲❤️ “
نال هذا المنشور تفاعل كبير على مواقع التواصل الاجتماعي واشادوا بشهامة واخلاق المخرج محمد سامي فهو الان مخرج كبير وله اسمه في الساحة الفنية ورغم نجاحاته الكثيرة ومكانته الكبيرة لم ينسى من كان صاحب الفضل عليه في بداياته ومن دعمه وان هذا المنشور جاء في وقت لا توجد فيه مناسبة لهذا الشكر .
